မီး(၈)မျိုး

မီး(၈)မျိုး

၁။ #ပကတိမီး = ထင်းမီး ဂက်စ်မီး စတဲ့မီးတွေပါ။ ပေါ့ဆလို့ မီးလောင်သွားရင် အိုးအိမ်တွေကို ပျက်စီး ဆုံးရှုံးစေတယ်။ လူကိုလည်း သေစေနိုင်တယ်။ သို့သော် နေရာတိုင်း မလောင်နိုင်သလို အချိန်တိုင်းလည်း မလောင်မြိုက်နိုင်ပါ။ ရှောင်လို့ ရနိုင်ပါတယ်။
၂။ #ငရဲမီး = ငရဲကြီးရှစ်ထပ် နှင့် အရံငရဲငယ်တွေမှာ ရှိတဲ့မီးတွေပါ။ ပုထုဇဉ်တွေ အကုသိုလ်ကံကြောင့် ငရဲရောက်ရင် အလောင်ခံရပါမယ်။ သို့သော် သောတာပန်အရိယာများ ဒီငရဲမီးက လွှတ်ပါတယ်။ ပုထုဇဉ်ဖြစ်ပေမယ့် သီလလုံခြုံရင် ကောင်းမှုကုသိုလ်တွေ စိတ်ထားမွန်မြတ်သူများ ဒီငရဲကို မရောက်ပါ။ အကုသိုလ်ကြောင့်သာ ရောက်ရပါတယ်။
၃။ #ကမ္ဘာဖျက်မီး = ၆၄ အန္တရကပ်ကုန်လို့ ကမ္ဘာပျက်ချိန်တန်ရင် ကမ္ဘာလောကကြီးတစ်ခုလုံး (စကြာဝဠာတိုက်တစ်သောင်း) ကို လောင်ကျွမ်းတဲ့မီးပါ။ အဲဒီအချိန်ကျရင် သတ္တဝါတွေအားလုံး လောကပါလနတ်တွေ တိုက်တွန်းနှိုးဆော် သတိပေးမှုကြောင့် ထိတ်လန့်သံဝေဂရကာ ဗြဟ္မစိုရ်တရားတွေထားကြပြီး ကမ္ဘာဖျက်မီး မရောက်နိုင်တဲ့ ဗြဟ္မာပြည်ကို ရောက်ပါတယ်။ ငရဲရှစ်ထပ်လည်း ပျက်စီးပါတယ်။ (နိယတမိစ္ဆာဒိဋ္ဌိ၊ ဖန်ဆင်းရှင်အယူရှိသူတွေကတော့ ငရဲကမလွှတ်ဘဲ မီးမလောင်တဲ့ တခြားကမ္ဘာက ငရဲကို ပြောင်းပြီး ကျရတယ်လို့ဆိုတယ်)
၄။ #ကိလေသာမီး = လောဘ၊ ဒေါသ စတဲ့မီးတွေပါ။ လူနတ်ဗြဟ္မာ သတ္တဝါတွေကို အလွှတ်မပေးဘဲ အချိန်တိုင်း လောင်မြိုက်စေပါတယ်။ သို့သော် ဘုရား၊ ပစ္စေကဗုဒ္ဓာ ရဟန္တာများ ဒီမီးအားလုံးက လွှတ်ပါတယ်။ အောက်ဆင့် အရိယာများ အချို့သော ကိလေသာမီးများ လွှတ်ကြပါတယ်။
၅။ #ဇာတိမီး = ပဋိသန္ဓေနေခြင်း ဆင်းရဲမှုပါ။ အမိဝမ်းခေါင်းထဲ ကျဉ်းကြပ်စွာနေရခြင်း၊ ခက်ခဲစွာ မွေးဖွားရခြင်း ဒုက္ခတွေပါ။ သတ္တဝါတွေ မွေးဖွားတိုင်း ဒီဇာတိမီးကို ခံကြရပါတယ်။ သို့သော် အဇာတိဖြစ်သွားတဲ့ ဘုရား၊ ပစ္စေကဗုဒ္ဓာ ရဟန္တာများ ဒီဇာတိမီးကို လွှတ်ပါတယ်။ ပုထုဇဉ်များ ဘဝတိုင်း ဒီမီး အလောင်ခံရပါတယ်။
၆။ #ဇရာမီး = အိုခြင်းဆင်းရဲပါ။ ဇာတိဆိုတဲ့ ဘဝစလာရင် အိုခြင်းဆိုတဲ့ ဇရာမီးကို အချိန်တိုင်းကို အလောင်ခံကြရတယ်။ ခန္ဓာရလာကြတဲ့ ဘုရား ရဟန္တာတွေလည်း ဒီဘဝမှာ ဇရာမီး အလောင်ခံရပါတယ်။ ပုထုဇဉ်များ ဘဝတိုင်း ဒီမီး အလောင်ခံရပါတယ်။
၇။ #ဗျာဓိမီး = နာကျင်ခြင်း ဆင်းရဲပါ။ ဇာတိဆိုတဲ့ ဘဝစလာရင် ခန္ဓာကိုယ်မှာ ဗျာဓိဆိုတဲ့ ညောင်းညာကိုက်ခဲခြင်း၊ နာကျင်ခံခက်ခြင်း စတဲ့ရောဂါတွေ အမျိုမျိုး ခံကြရပါတယ်။ ခန္ဓာရလာတဲ့ သူတိုင်း ခန္ဓာရလာကြတဲ့ ဘုရား ရဟန္တာတွေလည်း ဒီဘဝမှာ ဗျာဓိမီး မလွှတ်နိုင်ပါ။ ပုထုဇဉ်များ ဘဝတိုင်း ဒီမီး အလောင်ခံရပါတယ်။
၈။ #မရဏမီး = သေခြင်းဆင်းရဲပါ။ မွေးဖွားခြင်း၏ အဆုံးနိဂုံးကတော့ သေခြင်းဆိုတဲ့ မရဏပါပဲ။ ခန္ဓာရလာရင် မရဏမီးနဲ့ နိဂုံးချုပ်ရပါမယ်။ ခန္ဓာရလာကြတဲ့ ဘုရား ရဟန္တာတွေလည်း ဒီဘဝမှာ ဒီမီးကို မလွှတ်ပါဘူး။ ပုထုဇဉ်များ ဘဝတိုင်း ဒီမီး အလောင်ခံရပါတယ်။
မီးအလောင်မခံရအောင် မီးလွှတ်တရားဖြစ်တဲ့ ဝိပဿနာကို ကျင့်နိုင်ကြပါစေ။
မေတ္တာဖြင့်
တောင်တန်းသာသနာပြုဆရာတော်
အရှင်သုခမိန္ဒ (စဝ်ဆုခမ်း)